LAOAG CITY – Masdaaw ni Barangay Chairman Luis Battulayan iti Barangay Parangopong iti ciudad ti Batac no apay a saan a kayat ni Barangay Kagawad Joey Sibucao ti agpa-swab test iti baet a daytoy ket maibilang a primary contact ti anak na a nagpositibo ti covid-19.

Inlawlawag na a napan naganak ti anak na iti ospital ken kas protocol ket dimmalan ti swab test no sadinno a positibo ti resulta na.

Inbaga ni Kapitan Battulayan a ti kagawad ti maysa a kangrunaan a nangtartaripato iti anak na isut gapuna a maibilang daytoy a primary contact.

Nupay kasta, nagkedked daytoy a dumalan ti swab test iti baet a mismo payen a dagiti pulis nga inbaon ni Mayor Albert Chua ti nangkasarita ken nangilawlawag no apay a nasken nga ag-RT PCR test.

Inpakaammo pay ti kapitan nga iti baet nga ammon ti kagawad a positibo ti anak na iti swab test ket napan pay laeng nagduty ken nakapulapol na ti dua a pada na met laeng a kagawad.

Innayon na a ti kayat na a dumalan ti swab test ket dagiti dua a kagawad a nakapulapol ni Sibucao a maibilang a secondary contact.

Inpalgak ti kapitan a nagkedked dagiti dua a kagawad gapu ta inpetteng da a masapol a ni pay laeng Sibucao ti rebbeng na nga umuna nga agswab test ken no negatibo ti resulta na ket saanen a kasapulan a dumalan da ti RT-PCR test.

Iti agdama, kuna ni Kapitan Battulayan a nagaramid da ti checkpoint iti sango balay da kagawad Sibucao tapno mabantayan da dagitoy, ngem ti kalusaw na manen ket naamoan da laeng a rumrumuar met ti asawa na iti likud tapno mapan agiwayway ti taraken da a karnero.

Gapu iti daytoy, kinasarita da dagiti bumalay a saan dan a rumuar ken mangkasarita da laengen ti mangiwayway pay laeng iti karnero da gapu ta dagitoy ket primary contact ket nasken nga agtalinaed da iti uneg ti balay.

Agpapan maisursurat daytoy a damag ket saan pay a nakasarita ni Kapitan Battulayan ni kagawad Sibucao gapu ta saanna a sungbatan ti tawag na tapno koma amwen na ania ti rason a saanna a kayat ti dumalan ti RT-PCR test.

Iyur-uray da met ti sumaruno nga addang ti City Health Office (CHO) maipapan iti panag-swab test ti barangay kagawad.