LAOAG CITY – Inreklamo ni Catherine Magay, residente iti ili ti Piddig ken agpapaay iti maysa a pamilya nga agtagikua ti maysa a panganan iti Brgy. 2 ditoy siudad ti Laoag ti barangay kagawad a ni Gilbert Miguel, residente iti Barangay 2 ditoy ciudad.
Daytoy ket kalpasan a maipagarop a binakal ti barangay kagawad ni Magay ti nakabotelya a sili ken paminta, ken pinagsasawan na pay ti dakes.
Iti eksklusibo nga interview ti Bombo Radyo Laoag kenni Magay, inbaga na a sangaribo a pisos ti pagbayad ni Miguel ti inorder na a mami ngem inbaga na nga awan pangsupli na.
Kuna ni Magay nga inbaon isuna ni Miguel a mapan na pasuplian ti kwarta na iti amo na a kabagyan met laeng ti barangay kagawad, ngem saanna a napasuplian gapu ta uray ti amo na ket awan barya na.
Inbatad ni Magay nga iti panagsubli na a saanna a napasuplian ti kwarta ti barangay kagawad ket pinagsasawan daytoy ni Miguel ken inawagan na daytoy a duldog.
Gapo iti sakit ti nakem ni Magay a nakanggeg kadagiti inbagbaga ni Miguel ket inadmiti na a napagsaw-an na met daytoy, ken kabayatan ti panagsinsinnungbat da ket inbakal ni Miguel ti bote ti sili ken paminta kenkuana rason ti pannakatama ti kibong-kibong na.
Inoetteng ni Magay a saan a mabuteng a mangireklamo ken ni Miguel ken mangnamnama a maikkat daytoy iti posisyon na kas barangay kagawad.
Inadmitir ni Barangay Kagawad Gilbert Miguel iti Barangay 2 ditoy ciudad ti Laoag nga inbakal na ti bote ti sili ken paminta ken ni Catherine Magay ngem saan a natamaan.
Inpetteng na a ni Magay ti immuna a nagsao kenkuana ti dakes ken maipagarop a mismisuutan na pay idi napan nangan iti pagpapaayan na a panganan rason a napagsawan na met ti dakes ken binakal na ti bote ti sili ken paminta.
Innayun ni Miguel a saan a laeng daytoy ti immuna a gundaway a nagriri da gapo iti madi nga ugali ni Magay.
Kunana a nakasaga a mangsango no ireklamo ni Magay.
Kabayatanna, inbatad ti amo ni Magay a nabigbig laeng ti nagan na a Josie, nabaringkuwas kalpasan a nangngeg na ti panagrirriri dagiti dua, a ti kangrunaan a naipalapayag kenkuana ket ti panangibaga ni Miguel ti duldog iti kadkadwa na.
Inbatad na a napan naganawa ngem inwadag laeng daytoy ni Miguel.
