LAOAG CITY – Nadesgrasia ti maysa a Barangay Kagawad bayat ti panangiturong na ti motorsiklo iti paset ti Brgy. 25 ditoy Siudad ti Laoag.
Segun ken ni PSSgt. Artemio Magaoay Jr., Duty Investigator ti Philippine National Police Laoag Traffic Division, nabigbig ti opisial a ni Brgy. Konsehal Edwin Pascual, agtawen ti 43, naasawaan ken residente ti Brgy. 54-B, Camangaan ditoy Siudad.
Inbatadna a maibasar kadagiti nakasarsaritada iti lugar a nakapasamakan ti desgrasia, bayat a dumaldalyasat ti nasao nga opisial ti Barangay nga agpa-laud ket dita a napukawan ti kontrol ti manibela.
Inlawlawagna a rumrummuar iti imbestigasion nga adda ti impluwensiya ti nasanger ti maseknan a nangitunda ti napasamak a desgrasia.
Kunana a nagsagaba ti sugat iti nagduduma a paset ti bagi ti maseknan nga opisial a dagus met a naitaray iti ospital.
Inlawlawag na a nakasuot met ti helmet ti biktima ken awan ti kinalubbon na iti dayta a gundaway.
Kabayatanna, nagpalagip ni PSSgt. Magaoay Jr. kadagiti motorista nangnangruna kadagiti Barangay Officials nga agbalin koma a napintas nga ehemplo kadagiti dadduma nga umili.
