LAOAG CITY – Naglikudan ni Barangay kagawad Emiliano Lumabao Jr. iti Barangay 8 iti ili ti San Nicolas ti naidanun a reklamo iti Bombo Radyo Laoag.
Daytoy ket mainaig iti maipagarop a pilpilyen na dagiti kabarangayan na nga agbalin a benepisyaryo ti Tulong Panghanapbuhay sa Ating Disadvantaged/Displaced wenno TUPAD program.
Inlawlawag ni Lumabao nga adda ti direktiba kenkuana manipod iti gobierno probinsyal nga agbiruk ti 10 nga agbalin a benepisyaryo ti nasao a programa.
Kuna na a sakbay a nagtignay ket inyuman na paylaeng daytoy ken ni Barangay Chairman Reynaldo Guillermo no sadinno nga inbilin na kenkuana a pagalaan da amin a sitio iti barangay da tapno awan dagiti aggiinnilem, nga isumet ti inaramid na.
Inpetteng na pay a no adda dagiti kastoy a programa ket ti ipangpangruna da nga alaen ket dagiti kalugaran da nga agkasapulan ti tulong iti barangay da.
mainaig iti daytoy, mamati ni Lumabao a ti reklamo kontra kenkuana ket adda ti pakainaigan ti mapaspasangasangan a Barangay ken Sang Kabataang Elections a maiyuswat intono Oktubre 30 ita a tawen.
Ni Lumabao ket agkandidato a para kapitan iti Barangay 8 iti ili ti San Nicolas.