LAOAG CITY – Balligi a naarestar ti maysa a Barangay Kagawad iti Brgy. Crispina iti ili ti Banna babaen iti naisayangkat nga Anti-illegal Drug Buy-bust Operation iti Brgy. Valenciano iti nasao nga ili.
Segun ken ni Police Captain Ashley Cacayorin, Hepe iti Philippine National Police iti ili ti Banna, nabigbig ti suspek iti operasion a ni Ramil Cacao y Dumali, agtawen iti 36, naasawaan, jeepney driver ken residente iti Brgy. Crispina iti nadakamat nga ili.
Inbatadna a natiliw ti suspek kalpasan a naaktuaran a nagilako daytoy ti maysa nga heat-sealed transparent plastic sachet a naglaon ti maipagarup a shabu iti maysa a pulis a nagpammaraang kas poseur-buyer.
Inlawlawagna a nakumpiskar dagiti otoridad iti suspek ti lima nga heat-sealed transparent plastic sachet a naglaon ti maatap a shabu nga agdagsen ti sumurok-kumurang maysa a gramo nga agbalor ti 6,800 a pisos.
Malaksid iti daytoy, naala pay ti maysa a ribu a pisos a nausar kas buy-bust money, maysa nga unit a passeger jeepney, maysa a tulbek, maysa a brown wallet ken bangbanglo pakairamanan ti maysa a nalukatan nga heat-sealed transparent plastic sachet.
Naammoan a ti suspek ket maysa a drug surrenderee idi tawen 2015 ken maibilang nga High Value Individual.
Mainaig iti daytoy, naiget a naglikudan ti subject ti operasion a kukuana dagiti nakumpiskar a kontrabando.
Kabayatanna, kuna ni Brgy. Chairman Reynaldo Duldulao iti Brgy. Crispina iti ili ti Banna a nasayaat a tao ti kabarangayanna no sadino awan met ti nakaidamdamaganna.
Iti agdama, adda iti kustudiar ti Philippine National Police iti ili ti Banna ti suspek ken sumango iti kaso gapu iti panaglabsing iti Comprehensive Dangerous Drugs Act of 2002.
