LAOAG CITY – Inbatad ni Mr. Christopher Pascual, taga Bulacan ken dati a training coordinator iti maysa a pribado a pagadalan iti Cainta, Rizal a nakigtot iti iraraot ni Barangay Kagawad Abraham Acob iti Barangay Buyon, Bacarra, Ilocos Norte iti balay ti live-in partner na a ni Rosie ANgeles iti paset ti Barangay 28 iti nasao nga ili.
Inlawlawag ni Pascual a dua a tawenen nga agayan-ayat da ken ni Rosie ngem dua a lawas da pay laeng nga agliv-live in gapu ta nagdesisyon nga umay laengen agnaed ken agtrabaho ditoy Ilocos Norte.
Nupay kasta, nakigtot idi napan rinaot ni Acoba ken maipagarop a nagpaputok pay ti paltog ti nasao a barangay kagawad.
Segun met iti ina ni Rosie a ni Mrs. Rose Angeles, uppat a tawenen a nagsina ti barangay kagawad ken ti anak na.
Kabayatanna, mamati ni Police Staff Sergeant FRancisco Galo, imbestigador iti PNP iti ili ti Bacarra nga imon ti makaigapu a naaramid ti barangay kagawad ti rimmaot ken nagpaputok ti paltog.
Inpalgak ni Galo a mabalin nga adda pay laeng ti relasyon da Rosie ken Acob isut gapuna a nagimon ti barangay kagawad idi nakita na ni Pascual iti balay ti maseknan.
Iti sabali a bangir, inadmitir ni Barangay Kagawad Abraham Acob iti Barangay Buyon, Bacarra, Ilocos Norte a saan da pay a nagsina ken ni Rosie Angeles, residente iti Barangay 28, Cabusligan iti nasao nga ili.
Inbatad na nga innem a tawen ken innem a bolan dan ken ni Rosie gapu ta nangrugi ti relasyon da idi Hunyo 21, 2013 ken adda pay dagiti gundaway nga umyan iti balay ti nobya na.
Inlawlawag na iti Bombo Radyo Laoag a napan iti balay da Rosie tapno mapan makipaskua ngem ditoy a nadanun na ni Mr. Christopher Pascual, a taga Bulacan.
Segun kenkuana, apaman a nakita ni Pascual ket nagtaray a simrek iti balay da isut gapuna a kinamat na ken ditoyen a naggubal da.
Inpetteng ni Acob a ti inbaga kenkuana ni Rosie ket kaanakan na ti simmangpet ngem idi nakita na ti ladawan dagiti dua iti facebook ket nangrugin a nagatap isut gapuna a napan iti balay ti babai tapno kumpirmaren na ti atap na.
Inpakaammo na a kinomprontar na ni Rosie ngem inpasingked kenkuana ti babai nga agpagayam da laeng ken ni Pascual.
Nasakit ti nakem ni Acob gapu ta naamoan na a dua a tawenen da Pascual ken ni Rosie ken nalawag daytoy a pammaneknek a nabayag dan a linukluko.
Gapu iti daytoy, inpalgak na a saannan a pagan-ano ti babai ken saanna a kayat ti pakatkatawaan isut gapuna nga inawat nan ti napasamak.
Kabayatanna, inpasingked ni Acob nga awan ti kinapudno na ti alegasyon a nagpaputok ti paltog gapu ta awan ti paltog na ken naggubal da laeng ken ni Pascual.
