LAOAG CITY – Nasugat ti ulo ken rupa da Barangay Kagawad Crisanto Rasay, agtawen ti 41 ken ni Chief Tanod Joel Lagula agtawen ti 55 kalpasan a napanda naganawa iti riri ti agama iti Barangay 18 San Isidro iti ili ti Sarrat.
Nabigbig ti suspek a ni John Aaron Castro, agtawen ti 18, mekaniko ken residente ti Barangay 18 San Isidro iti nasao met laeng nga ili.
Segun ken ni P/Capt. Kester Arellano, Hepe ti Sarrat Municipal Police Station, napan nagresponde dagiti dua a biktima iti panagriri ti suspek ken ti amana.
Inbatadna a kabayatan nga an-anawaen dagiti opisial ti barangay ti suspek ket nakapungtot daytoy ket kimmarit pay kadakuada.
Mainaig iti daytoy, kunana a nakapidot ti natangken a banag ti suspek ket ditoy a dinarup ken pinang-orna dagiti maseknan a barangay officials.
Naitaray iti Dingras District Hospital dagiti biktima para iti naan-anay a pannakataming dagitoy.
Naammoan a menor de edad pay laeng ti suspek ket addan dagiti sumagmamano a nakairamramananna a riribuk iti barangayda.
Kabayatanna, ti suspek ket agdama nga adda iti pagbaludan ken mapilaan ti kaso a Direct Assault ken Frustrated Homicide.
