LAOAG CITY – Naipilaan ti kaso a frustrated homicide kontra iti suspek iti napasamak a pammagkong iti Barangay Baresbes iti ili ti Dingras.
Nabigbig ti suspek a ni Rafael Agustin, addaan ti umno a tawen ken residente iti nasao a barangay idinto a ti biktima ket ni Barangay Kagawad Ediefer Batucal, agtawen ti 38, naasawaan ken residente iti Barangay San Marcelino iti nadakamat nga ili.
Segun kenni Police Captain Norman Pentang, ti hepe ti PNP-Dingras, ti kaso ket naipila babaen ti inquest proceeding ken ti suspek ket nagtalinaed iti kustudiyar ti pulisya.
Maipalagip a naitaray iti ospital ti biktima kalpasan ti panangbagkong kenkuana ti suspek partikular iti tengnged gapo iti saan a panagkinnaawatan ken agpada dagitoy nga adda iti impluwensya ti nasanger.
Saan metten nga inbuksilan ni Pentang no anya ti partikular a rason ti saan a panagkinnawatan ti biktima ken suspek.
Gapo iti daytoy, inbakal ti suspek ti botelya ti arak ken inasot na ti kutsilyo na nga isu ti inusar na iti krimen.
Inbatad na a napasamak ti insidente iti asideg ti Barangay Hall iti Barangay Baresbes bayat ti panagpyesta ti nasao a lugar.
Agtultuloy met ti imbestigasyon ti PNP-Dingras seknan iti pammagkong.
