LAOAG CITY – Natay ti maysa a Barangay Kagawad kalpasan a nakuryente idiay Barangay Nagbacalan iti ili ti Paoay.
Nabigbig ti biktima a ni Villamor Menor, agtawen ti 56 ken residente iti nasao a barangay.
Segun kenni Police Senior Inspector Eddie Suyat, chief of police ti PNP-Paoay, adda ti kabarangayan na a timmawag kenni Menor gapo ta adda ti nag-spark a waya iti barangay da.
Inlawlawag na nga immuli ti kagawad iti poste ken adda ti paset ti live wire a naiggaman na a rason ti pannakakuryente na.
Inbatad na a kalpasan ti pannakukuryente na ket naisalapay iti waya.
Naitaray iti ospital idiay ciudad ti Batac ti biktima ngem naideklara a dead on arrival.
Naamoan a ni Menor nga isu ti barangay electrician ket awan ti protective gear na nga umili iti nasao a poste.
