LAOAG CITY – Balligi ti naisayangkat a search Warrant Operations ti PNP-laoag kontra iti maysa a Barangay kagawad ken “lei minister” iti Bgy. 8 ditoy ciudad ti laoag.
Nabigbig daytoy a ni Oligario delos Reyes, agtawen ti 61, ken addaan iti asawa.
Narekubre dagiti pulis ti 17 a babassit a sachet a naglaon ti maatap a shabu ken drug paraphernalia ken Kalibre 22 a paltog a paltic nga awan ti lisensiya, 4 a bala ti kalibre 22, ken 10 a bala ti kalibre 9mm.
Nupay kasta, naglikudan ni delos Reyes a kukua dagiti nadakamat a banag a naala iti pagtaengan na iti laksid nga inadmitir na a nagusar ti shabu itay laeng kallabes ken ibilang na a planted dagitoy.
Kabayatan na, maluksaw a masdaaaw ni Bgy. Chairman Ryan Bartolome iti Bgy. 8 gapu ta saan a ninamnama a mapasamak daytoy ken delos Reyes.
Kuna na a ti ammo na ket nagbalbaliwen ti kagawad na ta natiliw manen idi ngem na-acquit.
Inbaga na nga awan mabalin na no saan a sungbatan ti kagawad na ti maipila a reklamo kontra kenkuana.
