LAOAG CITY – Natiliw ti maysa a residente babaen ti naiyuswat a search operation iti pagtaengan na iti Brgy. 48-A Cabungaan ditoy siudad ti Laoag.
Nabigbig ti subject ti operasyon a ni Justine Renier Mandac y Correa, agtawen ti 37 a.k.a Aaron Renier Mandac.
Kalpasan ti panagsukisok dagiti kameng ti PNP Laoag, nabirokan da dagiti 15 a sachet a naglaon ti maipagarup a shabu a nakaipan iti wallet iti kuarti da nga agassawa.
Naglikudan ni Mandac a kukua na ti wallet a nakaikargaan dagiti narekobre.
Kuna na a malasin na ti wallet ken damo na a makita ti nasao a wallet nangruna ket saan nga agus-usar ti wallet ti babai.
Nupay kasta, inadmitir ni Mandac nga agus-usar ti iligal a druga idi estudyante iti high school ngem nabayagen a saanen nga agus-usar.
Inbatad ni Mandac nga adda ti tallo a lallaki nga immuna a simrek iti pagtaengan da sakbay a naiwayat ti operasyon.
Malaksid kadagiti sachet ti maatap a druga, nakarekobre pay dagiti otoridad ti maysa a 5.56mm a bala.
Naamuan a ni Mr. Mandac ket kameng iti Barangay Lupon ken seaman.
Iti mainaig a damag, inbutaktak ni Mrs. Diane Mandac, asawa ti subject ti search operation a dagiti tallo a lallaki a simrek ti pagtaengan da sakay ti search operation ket nakasuot ti cargo pants, nakasuot ti green ken ti maysa nga agapilyedo ti Ganir.
Kuna na a simrek dagiti maseknan uray nakarekep ti gate da ken simrek da iti kuarto da.
Segun kenni Mrs. Mandac, nagpaot dagiti tallo a lallaki iti uneg ti kuarto da.
Adda pay dagiti agpilit a sumrek iti pagtaengan da.
Innayon na a naggapu iti kusina daytoy ket idi sumrek ket nakaipaturong ti tallo a paltog kenkuana.
