LAOAG CITY – Inpakaammo ni Ms. Chariz Garma, mangidadaulo ti Department of the Interior and Local Government ditoy siudad ti Laoag nga ad-adda a nagbalin nga aktibo dagiti barangay officials ditoy siudad babaen ti pannakaipatungpal ti Road Clearing Operations.
Segun kenkuana, daytoy ti maysa a kalikagumda a mapagbalin nga aktibo dagiti opisial ti barangay ti panagdalus iti aglawlaw.
Inbatadna a babaen kadagiti reports nga ar-aramidenda ken maipadpadanon iti opisinada ket makitana no kasano dagitoy a kaaktibo iti panagipatungapal ti Road Clearing Operations.
Inlawlawagna a saan laeng dagiti opisial ti barangay ti makitkitana nga agdaldalus iti barangay no di ket pakairamanan payen dagiti residente ken dadduma pay.
Innayonna a babaen iti daytoy ket ad-adda pay a mapaigetan ti pannakaipatungpal dagiti pagannurotan ti Department of the Interior and Local Government iti uneg ti barangay.
