LAOAG CITY – Maipaayan ti libre a basic medical examination iti kada tawen dagiti amin a barangay officials ditoy siudad ti Laoag sakbay wenno kalpasan ti makalawas a panagkasangayda.
Daytoy ket maibasar iti Draft City Ordinance No. SP-2025-002 a maysa nga ordinansa a mangipaay ti libre a basic medical examination iti kada tawen babaen ti gobierno lokal iti Laoag City General Hospital (LCGH) ken Office of the City Health Office (OCHO) para kadagiti barangay officials ti walopulo a barangay ditoy siudad ti Laoag, sakbay wenno kalpasan ti makalawas a panagkasangayda.
Daytoy ket indasar ti Committee on Social Welfare and Development and Public Service and the Committee on Health and Public Sanitation.
Dakkel ti akem ken responsibilidad dagiti barangay officials iti maysa a komunidad rason a maipaayan dagitoy ti tulong medikal iti kada tawen.
Napateg a mapagtalinaed ti kinasalun-at dagitoy tapno mas ad-adda a makatulong, makaserbida a naimbag kadagiti masakupan.
Naammoan a ti pannakaipay ti libre a medikal iti kada tawen tunggal sakbay ken kalpasan ti makalawas a panagkasangayda ket dakkel a tulong kadakuada nangruna ket saan a nalaka ti iggemda a responsibilidad.
Kabayatanna, ti nasao nga ordinansa ket naaprobaran iti maikatlo a pannakaibasana kabayatan ti regular session ti Sangguniang Panlungsod.
