LAOAG CITY – Maproblemaan dagiti opisial ti Brgy. Cabungaan-B ditoy siudad ti Laoag ti pakaipatakderan ti baro a Day Care Center-da.
Daytoy ket kalpasan a pinabakbaken ti akinkukua ti lote a nakaipatakderan ti dati Day Care Center-da.
Gapu iti daytoy, temporario nga agklasklase dagiti Day Care pupils iti umuna a kadsaaran ti Barangay Hall iti nasao a barangay.
Segun ken ni Brgy. Chairman Broniel Domingo ti Brgy. Cabungaan-B ditoy siudad ti Laoag, saanna nga ipalubos nga agbayag ti panagklase dagiti ubbing iti Barangay Hall gapu ta saan nga agbalin a komportable dagiti ubbing kabayatan ti panagbasada.
Inbatadna a kitkitaenda iti agdama no ayanno ti posible a mabalin a temporario a pagklasean dagiti maseknan nga ubbing kagiddan ti panangkitada pay ti sumaruno a pakaipasdekan ti baro a Day Care Center-da.
Inlawlawagna a saanna met nga ipalubos nga iti maikadua a kadsaaran iti Barangay Hall-da ti pagklasean dagiti ubbing iti baet nga adda ti air-conditioned daytoy gapu ta maamak isuna no bilang adda ti matnag kadakuada.
Kunana a daytoy a banag ket kiniddaw ni Ms. Carol Quiazon, Day Care Worker iti barangayda ngem saanna a pinatgan gapu iti posible a mapasamak a desgrasia nangruna ket adda dagiti sumagmamano nga ubbing a natuleng.
Kabayatanna, naammoan nga addan ti 11 a tawen ti nasao a Day Care Center a nagserbi a pagbasaan dagiti ubbing ngem nabakbak daytoy idi Marso gapu iti pammilin ti akinkukua ti lote.
Immuna iti daytoy, nagkiddaw ti tulong ti nasao a Day Care Worker ken ni Vice Mayor Rey Carlos Fariñas banag a kalikagum ti Bise Mayor nga iyuman daytoy ken ni Mayor Michael Marcos Keon.
