LAOAG CITY – Desidido ti Barangay Officials ti Barangay Cataban ditoy siudad ti Laoag a mangipila ti reklamo kontra iti Barangay Treasurer a maipagarup a nagkurakot ti pundo ti barangay.
Daytoy ti inbatad ni Barangay Chairman Bryan Batulayan kalpasan a saan a napatgan ti Barangay Treasurer ti immunan nga inpanamnamana iti konseho a bayadanna ti nakurakot a kuarta agingga iti Disiembre 31, 2025.
Inpasiguradona a saanna nga ipalubos a makalusot manipud iti anomalya nga inaramidna tapno adda ti pagmennamennaanna.
Inlawlawagna nga iti agdama ket nagtalinaed nga isu ti nakatugaw kas Barangay Treasurer ti nasao a barangay gapu ta kalikagumda a maipasubli dagiti amin a dokumento sakbayda a sukatan.
Maipalagip a kinumpirmaran ni Kapitan Batulayan nga umabot iti 256 a ribu a pisos nga in-inot nga inruar ti Barangay Treasurer babaen ti 2024 budget ti barangay.
Kunana a naaramid ti Barangay Treasurer daytoy babaen ti panangpeke ti pirmana ken saanna a masinunuo no nangikabkabilanna dagiti kuarta.
Naammoan a naduktalanda daytoy kalpasan a saan a kayat nga ipakita ti Barangay Treasurer kadagiti kameng ti konseho ti barangay ti cash booklet.
Gapu iti daytoy, nagturongda iti Accounting Office iti City Government ket ditoy a nakitada nga adda dagiti nai-withdraw a saan a naipakaammo kadagiti opisial ti barangay.
Immuna iti daytoy, inkarigatan ti Bombo Radyo Laoag News Team nga alaen ti takder wenno reaksion ti nasao a Barangay Treasurer ngem awan daytoy iti pagtaenganda ken saan a sumungsungbat ti tawag ken mensahe iti online account-na.
