LAOAG CITY – Saan nga umanamong ni Sangguniang Panlungsod Atty. Jason Perera iti ordinansa a Barangay Purchase Permit kadagiti hog raisers ditoy siudad ti Laoag.
Kunana a daytoy ket naipasan ken adda iti maikadua a pannakaibasana.
Ti nasao a permit ket masapul nga ikiddaw nga umuna ti hog raiser tapno mairuar a mailako ti baboyna no sadinno a maisaad pay no mano ti kilo ken mano ti mapatta-patta a paglakoan ken adda iti kanayonan a bayadan ti agtartaraken iti barangay.
Segun kenkuana, ado ti maapektaran a hog raisers ken meat vendor no sadinno a saan a mailako ti baboy no awan ti nasao a permit.
Kunana a mabalin a dumakkel ti expenses ni hog raiser kas ti logistics no sadinno nga adda posibilidadna nga agsubli-subli daytoy tapno laeng makaala ti permit iti barangay hall.
Inbatadna a no saan nga on-time ti pannakailako ti baboy gapu ta napaay ni hog raiser a mangala ti permit ket adadda a dumakkel ti capital ti agtartaraken gapu ta agtultuloy ti konsumo ti baboy kas kuma ti feeds, agas, ken padanom.
Inpettengna a saan a napintas ti nasao nga ordinansa gapu ta iti babaen ti Local Government Code, ket maipawil ti kanayonan a bayadan ti maysa a mannalon wenno hog raiser no aglako daytoy iti bukodna a taraken wenno aniaman nga agricultural products.
Innayon ni Perera nga imbes a ti gobierno ti manggutigot kadagiti hog raiser ti wayada a mangmanehar ti negosio da ket saan gapu ta kasapulan a maamoan wenno maikabil iti nasao a permit dagiti paglakoan ken kilo ti baboy.
