LAOAG CITY – Kinumpirmaran ni Mayor Alex Calucag iti ili a Solsona nga aadda da barangay ranger officer(BRO) iti ili da a maipagarup nga agar-aramid ti illegal a panagpukan ti kayo.
Daytoy ket kalpasan a naruay a nagduduma a klase ti kayo dagiti nakita da a napukan iti kabanbantayan a paset ti Brgy. Katangraran ken Bgy. Sta Ana.
Kuna na babaen iti pannakisarita na iti kapitan ti barangay ket napagpudno da dagiti nagpukan ken dagiti naglako.
Inbatad ni Calucag nga adu a disso dagiti nagpukanan dagiti maseknan a BRO a no sadinno a dagiti napukan a kayo ket ti Guyoong, Balitaweng, Gmelina, Mahogani ken Accacia.
Mainaig iti daytoy, awan ti naipakita a permit nga agpukan dagiti maseknan a BRO ken ti nausar a chainsaw ket kukua ti probinsiya.
Gapu iti daytoy, plano ni Mayor Calucag nga idatag ken ni Gov. Imee Marcos dagitoy a duktal da.
Daytoy ket gapu ta dakkel ti pondo a maus-usar para iti greening program iti nasao nga ili.
Kuna na a masapul nga agsungbat dagiti maseknan a kameng ti barangay ranger officer(BRO) gapu iti inaramid da nangnangruna ket chainsaw ti probinysa ti inusar da.
Kabayatanna, inawangan ni Calucag a bantay salakay dagiti maseknan a BRO gapu ta imbes a dagitoy ti mangsaluad kadagiti kabanbantayan ngem dagitoy metten ti mangdaddadael.
