LAOAG CITY – Umab-abot iti dua punto tallo a milyon a pisos ti tulong nga inpaay ti gobierno probinsial babaen iti Gender and Development Office wenno GAD kadagiti Barangay Service Point Officers wenno BSPO’s ken dagiti “teen moms” wenno ubbing nga inna ditoy probinsia.
Inpakaammo ni Ms Janet London, mangidadaulo iti Gender and Development Office a lima gasut tallopulo ket tallo dagiti Barangay Service Point Officers nga immat ti tallo ribu a pisos tunggal maysa.
Inlawlawa na a gapu iti kaawan ti maipapaay a sueldo kadagitoy ket ikarkarigatan ti probinsia ti mangipaay ti suporta kadakuada.
Malaksid kadagiti Barangay Service Point Officers nangipaay pay ti gobierno probinsyal ti tulong pinansial a dua ribu lima gasut a pisos iti tunggal maysa kadagiti 278 a “teen moms” wenno ubbing nga inna.
Inpalagip ni London a kadagitoy nga adda ti agur-uray a napinpintas a biag kadakuada.
Imbatad na nga ania man dagiti saan a napintas a nagbalin a padas dagitoy wenno saan a nasayaat a naaramidanda ket masapul nga itultuloy dagitoy ti makilaban iti biag.
Kinarit ni London dagitoy a mangitultuloy kadagiti napipintas nga arapaapda iti biag para iti napinpintas a masakbayan dagitoy.
Impadanon na pay ti panangnamnamana a makatulong kadagiti maseknan ti tulong nga inpaay ti probinsia kadakuada.
Ginutigot na dagiti maseknan a manggundaway kadagiti “livelihood program” nga isaysayangkat ti Gender and Development Office.
Innayon na pay a ti probinsia ket ikarigatanna nga ipaay ti amin a kabaelanna a maited kadagiti kakailian.
