LAOAG CITY – Inlawlawag ni Brgy. Chairman Leomel Sumngat iti Brgy. Maglaoi iti ili ti Currimao a naaksiyonanen ti maipagarup a panagkataw ti maysa a barangay tanod iti barangayda ti napidotna a selpon.
Segun kenkuana, apaman nga adda ti naawatda a report maipapan iti nasao nga isyu ket binirukda nga insigida ti maseknan a barangay tanod ken kinasaritana daytoy.
Inbatadna a ti inaramid ti barangay tanod ket saan a makuna a panagtatakaw gapu ta idi napidot ti barangay tanod ti selpon ket saanna laeng a dagus nga inpulang iti police station wenno ti barangayda no di ket napanna inkabil iti maysa a pagpatarimaanan ti selpon ken maipagarup nga inpaikkatna pay ti password-na daytoy.
Kunana nga agtalek isuna iti maseknan a barangay tanod gapu ta nagserbi daytoyen iti las-ud ti lima a tawen iti barangayda.
Nupay kasta, inpalgakna a masapol a sumango daytoy ti maiyannatop a pannusa tapno saanen a maulit pay ti nasapamak.
Mainaig iti daytoy, naammoan a naisubli met laeng iti akinkukua ti napidot a selpon ti barangay tanod.
Innayonna nga iti agdama ket temporario a nasuspinde ti nasao a barangay tanod tapno adda ti pagmennamennaanna daytoy.
Immuna iti daytoy, adda ti naawat nga impormasion ti News Team ti Bombo Radyo Laoag maipanggep iti maipagarup a panagtakaw ti maysa a barangay tanod ti napidotna a selpon.
