LAOAG CITY – Naibida ti panagusar dagiti barangay tanod iti Brgy. San Vicente ditoy ciudad ti Laoag ti bisikleta iti panagpatrolya da iti masakupan da a lugar.
Segun ken ni Liga ng mga Barangay President Rbee Ablan, ti nasao nga addang ket saan laeng a makatulong tapno mapagtalinaed ti linak, urnus ken talna, no di ket tapno maitandudo pay ti nasalun-at a pammagi dagiti barangay tanod ken panangtulong iti aglawlaw.
Innayon na nga iti baet a ngimmato ti presyo dagiti produkto a petrolyo, mamati a babaen ti panagusar ti bisikleta ket praktikal ken beneficial.
Mainaig iti daytoy, inpakaammo ni Ablan nga iti agdama ket adda ti walo a bisikleta ti nadakamat a barangay nga usaren dagiti barangay tanod nga agpatrolya.
Mangnamnama ni Ablan nga adaptaren daytoy dagiti dadduma pay a barangay ditoy ciudad ti Laoag.
Innayon na a ti nabayagen a panagus-usar dagiti barangay tanud ti bisikleta iti panagpatrolya da iti nadakamat a barangay ket ad-addan a makita ti kinapintas ti epekto na aglalo iti pannakaipangato ti presyo dagiti produkto a petrolyo.
