LAOAG CITY – Maibilang a nagasat ti maysa a barangay tanod gapu ta saan a pulos a natamaan kalpasan a pinaltu-paltugan ti riding in tandem suspects iti paset ti Barangay Pasuc, Badoc, Ilocos Norte.
Daytoy ti inbatad ni Police Major Artemio Clemente, ti chief of police iti ili ti Badoc.
Binigbig ni Clemente ti biktima a ni Jay Glenn Dagupion, barangay tanod ken residente met laeng iti nadakamat a barangay.
Segun ken ni Clemente, nakalugan ti motorsiklo ti biktima nga agturong koma iti ili ti Pinili, kadwa na ti asawa ken anak na idi pinaltu-paltugan dagiti saan pay a nabigbig a suspek ngem nagasat gapu ta saan a natamaan.
Nakarekobre dagiti otoridad ti uppat nga empty shells ti kalibre 45 a paltog iti nakapasamakan ti pammaltog.
Inbatad ni Clemente a basar iti imbestigasyon da ket adda ti nakikapkappengan a grupo ti biktima ken nakairamramanan na a kaso.
Saan metten a nailawlawag ni Clemente no ania a grupo ken kaso ti nakairamramanan ni Dagupion.
Iti agdama, agtultuloy ti imbestigasyon tapno maamoan ti motibo iti krimen ken ti panangbirbiruk dagiti otoridad kadagiti saan pay a nabigbig a suspek.
