LAOAG CITY – Iti Lawrenceville, Georgia, maysa a world record ti nagun-od idi agluto ti kompania ti barbecue grill ti 655 pounds ken 12.8 ounce ti chicken wings kas paset ti 50th anniversary-da.
Sinelebraran ti kompania a Big Green Egg ti milestone-da iti tinawen nga Eggtoberfest, maysa a grill expo a nagtitipon dagiti nalalaing a barbecue chef tapno agluto ti chicken wings babaen ti 47 extra-large kamado-style grills nga aramid ti kompania.
Naammoan a ti chicken wings a naikkan ti Ed’s Famous Wing Sauce ket opisial nga inkilo dagiti pannakabagi ti Georgia Department of Agriculture.
Iti kadagsen daytoy, naballigi a nagun-od ti Guinness World Record para iti titulo a “Biggest Serving of Chicken Wings”.
Saan laeng a nagleppas iti panagluto ti selebrasion, dagiti manok ket napagsasangoan dagiti nagatendar iti festival idinto ti nabati ket naipaay kadagiti local charity groups.
