Ginutigot ni House prosecution panel adviser ken spokesperson Ace Barbers dagiti national security officials nga imbestigaren no gungundawayan ti China dagiti isyu a saan a pagkinnaawatan iti pulitika ti Pilipinas iti baet ti impeachment trial ni Vice President Sara Duterte ken dgiti tension iti West Philippine Sea (WPS).
Segun ken ni Barbers, kasapulan nga amoen no nairanta laeng dagiti tignay ti China iti kabaybayan wenno paset daytoy ti nalawa nga estratehia tapno pakapuyen ti panagkaykaysa dagiti Pilipino.
Nupay kasta, inlawlawag ti dati nga agpanpanday linteg a saan nga umdas dagiti panaggegeddan ti pasamak tapno mapaneknekan nga adda pakainaiganna dagiti mapaspasamak. Kunana a masapol a nakaibasar iti mapagtalkan nga intelligence ken beripikado nga ebidensia ti aniaman a pannakatingiting.
Nagballaag ni Barbers a mabalin a gundawayan ti China ti nakaro a susik iti lokal a politikano maiyakar ti atension ti publiko manipud kadagiti saritaan iti West Philippine Sea.
