LAOAG CITY – Inpakaammo ni Barangay Chairwoman Marilyn Resquir nga adda ti nakalibas manen ti barito nga adda iti sidong ti bahay pag-asa ditoy siudad ti Laoag.
Kuna na a daytoy met laeng ti datin nga agliblibas ken agtaktakaw tapno makapan iti sabali a lugar.
Segun ken ni Resquir a nakaawat ti tawag manipod iti bahay pag-asa ken dita a naipakaammo a nakalibas manen ti barito.
Inbatad na a dagus a nagturong da iti lugar ken naiyuswat ti panagbirok babaen met laeng iti tulong dagiti dadduma nga opisyal ti barangay.
Kuna ti kapitan a basar iti panagimbestigar da ket timmapwak iti alad ti bahay pag-asa ken nagturong iti Santiago apartment ken nagbirok da iti evacuation center ngem saan da a nabirokan daytoy.
Inpakaammo na a nagturong da pay iti Brgy. Nalbo agingga iti Brgy. Tangid ngem saan a nabirokan ti barito.
Immuna iti daytoy, kuna ni Resquir a bayat ti panagbirbirok da iti barito ket adda ti nakaibaga kadakuada a nagsukat iti bado ken daytoy ket maipagarup a tinakaw na.
Agpapan a maisursurat ti damag ket saan pay a nabirokan ti barito ken awan pay ti mapatta-patta a nagturungan daytoy.
