LAOAG CITY – Itudtudo ti grupo a Freedom Flotilla Coalition ti Israel nga isu ti responsable iti drone attack iti barkoda a mangipatulod koma kadagiti taraon idiay Gaza.
Segun iti grupo a natamaan ti drone ti barkoda iti international waters a sakupen ti Malta.
Gapu iti daytoy, nadadael ti The Conscience ship idinto a natalged met dagiti nakalugan iti daytoy.
Awan ti nairekord ti Maltese government a natay gapu ta nakalasat amin dagitoy.
Naammoan a karaman kadagiti nakalugan iti nasao a barko ti nalatak nga aktibista a ni Greta Thunberg.
Adda ti pakabuklan a 12 crew ken 30 nga aktibista a nakalugan iti barko.
Plano ti NGO a paayaban dagiti ambassadors ti Israel tapno pagsungbaten ti panaglabsing ti international law ken ti iligal a pananglapped.
