LAOAG CITY – Nagdinnungpar ti barko ti Philippine Coast Guard ken China Coast Guard iti Ayungin Shoal a maysa a submerged reef iti paset ti Spratly Islands iti West Philippine Sea.
Basar iti rakurak ti China Coast Guard, maipagarup a saan nga ingkankano ti resupply ship ti Pilipinas ti paulit-ulit a ballaag ti China.
Inakusaran daytoy ti barko ti Pilipinas nga umasideg iti unprofessional a wagas ken nagresulta iti panagdinnungpar.
Inakusaran ti China Coast Guard ti barko ti Pilipinas nga iligal a simrek iti baybay nga asideg iti Ayungin shoal.
Inpetteng ti China Coast Guard a maipagarup a nangisayangkatda ti control measures kontra iti barko ti Pilipinas kas maiyallubog iti linteg.
Nupay kasta, basar iti Armed Forces of the Philippines, panangallilaw ken panangulaw ti rakurak ti China Coast Guard a basol ti barko ti Pilipinas ti napasamak a panagdinnungpar.
Inbatad ni Armed Forces of the Philippines Spokesperson Col. Xerxes Trinidad, ti pudno nga isyu ket ti iligal a presensiya dagiti Chinese vessels iti Exclusive Economic Zone ti Pilipinas pakairamanan ti Ayungin Shoal no sadino nabayagen nga adda ti barko ti Philippine Navy nga imatmatonan dagiti Pilipino.
