LAOAG CITY – Nalaglagda ken narigrigat a matulad kangrunaan na ti mangpeke iti baro a 1000 peso bill a maiparuk-at intono Abril 2022.
Daytoy ti inpasigurado ni Doctor Evelyn Valdez, ti Bank Officer ti Bangko Sentral ng Pilipinas (BSP) – North Luzon Regional Office.
Segun ken ni Valdez, narigat a mapeke ti baro a 1000 peso bill gapu ta adda ti security features a narigat a matulad ti siasinno man.
Inpakaammo ni Valdez a naidumduma ti maiparuk-at a baro a kwarta gapu ta saan a dagiti banuar wenno nagbalin a presidente ditoy pagilyan ti naipan no di ket ti Philippine Eagle.
Immunan nga adda dagiti naikorehir iti baro a 1000 peso bill kas ti spelling ken ti pannaka-italicize ti scientific name ti Philippine eagle.
Ti baro a disenyo ti 1000 peso bill ket inaprubaran ti Monetary Board ken ti Office of the President.
