LAOAG CITY – Manamnama a marugianen ti pannakaaramid ti baro a dalan nga agturong iti SM ditoy siudad ti Laoag ita a tawen.
Segun ken ni Assistant Engr. Angelito Dian, ti Department of Public Works and Highways First District Engineering Office, daytoy ket kalpasan a nangiparuk-at ti 30 a milyon a pisos a pundo iti opisina ni Ilocos Norte 1st District Representative Ferdinand Alexander Marcos III para iti pannakaipatungpalna daytoy.
Inbatadna a manipud iti maysa a bilyon a pisos a project cost, 500 a milyon a pisos ket manipud iti dakkel a mall ken 500 a milyon a pisos ti kiniddaw ditoy siudad iti opisina ni Cong. Marcos idinto a ti 30 a milyon a pisos ket para laeng iti first phase ti proyekto.
Inlawlawagna a gagem ti nasao a kalsada ket para iti pannakaalay-alay ti posible a panagirut ti taray ti trapiko iti Gilbert Bridge ken iti Airport Road.
Inpalgakna a saanda a maikamat ti pannakaipasdek ti nasao a dalan iti manamnama a pannakalukat ti dakkel a mall ditoy siudad inton Disiembre.
Innayonna a ti maipasdek a dalan ket mangrugi iti bypass road ditoy siudad ti Laoag a kumamang iti likud ti SM idinto a ti dakkel a mall ti agaramid ti kalsada a kumamang iti Gilbert Bridge.
