LAOAG CITY – Inaprubaran ti Sanggnuniang Panlungsod ditoy siudad ti Laoag ti Draft City Ordinance No. 2020-007 series of 2020 nu sadino a nakaipalaon ti baro a fare guide a masurot ditoy siudad.
Segun ken ni Sannguniang Panlungsod Atty. Jason Perera, babaen iti nasao nga ordinansae ket mapagbalin a 12 a pisos ti dati a 9 a pisos a plete dagiti estudyante.
Inbatad na a ti met dati 11 a pisos a regular fare ket mapagbalin a 15 a pisos.
Mainaig iti daytoy, kuna ni Perera a nu tallo dagiti aglugan iti tricyle ken dagitoy ket ubbing nga agtawen ti 12 agpababa ket agplete da ti 10 a pisos.
Inlawlawag ni Perera a ti napagnunumoan a baro a maipatungpal a plete ket naibasar iti minimum wage ken adda ti pannakaikonsiderar ti nagduduma a posible a gastos dagiti pasahero iti kada aldaw.
Patien ti konsehal a win-win solution ti nagbalin a desisyon ti konseho.
Innayun ni Perera a naipasan ti ordinansa ken ni Mayor Michael Marcos Keon ken maiyur-uray ti panangaprubar na.
