LAOAG CITY – Saanen a maisubli iti Bahay Pag-asa iti Brgy. 48-A Cabungaan ditoy siudad ti Laoag ti baro a kanayun nga naglibas manipod iti pasilidad.
Daytoy ti inbatad ni Pol. Lot. Col Wyrlo O. Gatoc ti Officer in Charge iti Criminal Investigation and Detection Group iti ditoy probinsya kalpasan a nabirokan ken natiliw iti maikalima a gundaway ti baro a binigbig na a ni Kairuz James Cruz, tubo iti ili ti Piddig.
Immuna iti daytoy, inpakaammo ni Gatoc a natiliw ni Cruz idi rabii ti Hunyo 11 idiay Monumento, Caloocan City babaen iti panakikoordinar ti dadduma nga ahensiya ken iti tulong iti maysa nga asset ti Criminal Investigation and Detection Group.
Inbatad ni Gatoc a ti nakatiliwan ni Cruz ket isu met laeng ti lokasyon a nakatiliwan na idi maikapat a gundaway a naglibas manipod iti Bahay Pag-asa.
Mainaig iti daytoy, inpakaammo ti opisyal a bayat ti pannakatiliw ti baro ket saan metten a nagresistir daytoy gapu ta naiyuswat a naimbag ti cover-up.
Kabayatanna, inbatad ni Gatoc nga apaman a naiparuk-at ti warrant of arrest kontra iti baro ket immuna a nagturong iti ili ti Piddig kalpasan a naglibas.
Kuna na a nagturong da iti nasao nga ili idi Hunyo 10 ngem dita a naamoan a nakatalawen iti ili ti PIddig ti baro ken nagturong iti ili ti Sarrat sakbay a napan iti ili ti San Nicolas nga isu met ti nagsadaan na iti bus tapno rumuar ditoy probinsya.
Rurumuar a ti rason ti panagturong a kanayon ti baro iti Caloocan City tunggal aglibas ket ti panagkitkita da iti nobya na ngem daytoy ti iberipikar pay dagiti otoridad.
Iti agdama ket nagtalinaed ti baro iti kustodyar ti Criminal Investigation and Detection Group bayat a maiyur-uray ti covid-19 test result na sakbay a maiturn-over iti korte a naggapoan ti dua nga warrant of arrest nu sadino a nakailanad a sumango iti kaso a panaglabsing ti RA 6539 wenno carnapping act kas naamyendaran iti RA 10883 ken theft.
Daytoy ket kageddan ti pannakaiyuray ti commitment order nu BJMP wenno Provincial Jail ti pakaibalodan ti baro.
Maipalagip a ni Cruz ket naipan iti Bahay Pag-asa gapu iti panagsalungsing na ti RA 9165 wenno Dangerous Drugs Act of 2002 ken menor de edad pay laeng iti dayta a gundaway.
Nu pay kasta, masansan nga aglibas manipod iti nasao a pasilidad ken addan iti legal nga edad kalpasan a natapugan na ti tawen a 18 idi Pebrero isut gapu na a mapilaanen ti kaso.
Kabayatanna, naglikudan ti baro a ni Kairuz James Cruz a ti nobya na ti rinanta na idiay Caloocoan City ken isu ti makaigapu ti panaglibas na manipod iti Bahay Pag-asa.
Inpetteng na a naaramid na ti naglibas gapu ta mauma nga agur-uray iti panagtulidtid dagiti kaso na.
Nu pay kasta, immunan nga inpakaammo na a naglugan iti bus tapno makaruar ditoy probinsiya.
Inbatad na nga adda ti inusar na a panagplete gapu iti urnong na a kwarta.
Saan metten a nakaipaay ti reaksiyon ni Cruz iti posibilidad a panakaikabil na iti pagbaludan kalpasan iti inaramid na a panaglibas ken dagiti dadduma pay a maikanniwas iti linteg nga aktibidad na iti kallabes.
