LAOAG CITY – Ballaigi a naiyuswat ti groundbreaking ceremony para iti maipatakder a baro a library iti Department of Education-Division of Laoag City iti Barangay 23 ditoy ciudad.
Ti groundbreaking ceremony ket indaulwan ni Mayor James Bryan Alcid, Dr. Joan Corpuz, ti Schools Division Superintendent ditoy ciudad ti Laoag ken dagiti dadduma pay.
Inpasigurado met ni Mayor James Bryan Alcid tiagtul-tuloy a suportana para iti amin a proyekto ken programa ti DepEd-Laoag.
Inbatad pay ni Alcid a maysa kadagiti target ti lokal a gobierno ket maparactice ti real good governance transparency accountability.
Kunana nga adda ti naurnong a 3.8 million kadagiti proper bidding ken no ado ti maurnong ket ad-ado met dagiti proyekto ti maaramid.
Mainaig iti daytoy, inbatad ni Dr. Maricor Ramirez, ti Assistant Schools Division Superintendent Department of Education-Schools Division of Laoag a daytoy proyekto ket maysa kadagiti arapaapda para kadagiti agad-adal ken mangisursuro ditoy ciudad.
Segun kenkuana, ado dagiti division nga addaan ti library hub na ngem ditoy ciudad ket awan isut gapuna a napintas daytoy.
Inayon na a daytoy ket saan laeng pangikabilan kadagiti libro no ket agserbi pay para iti literacy program.
Nagyaman met ni Dr. Joan Corpuz, Schools Division Superintendent ti Department of Education- Schools Division of Laoag City iti lokal a gobierno ditoy ciudad kangrunanan kenni Mayor Alcid iti pangsuportana kadakuada.
Kunana a babaen iti daytoy a proyekto ket magutigot dagiti ubbing nga agbasa iti libro.
Mamati ni Corpuz a babaen iti aytoy ket matun-uyan dagiti pagkasapulan dagiti agad-adal ken ti panagsukisok para iti masakbayanda.
Kabayatanna, umabot iti lima a milyon a pisos ti balor ti nasao a proyekto.
