LAOAG CITY – Mangipakita a masapol a mangbuwangay ti baro a linteg iti maysa nga special voting period ti dakkel a turnout dagiti senior citizen ken persons with disabilities (PWD) iti nasapa a panagbotos a nalukatan para iti Barangay ken Sangguniang Kabataan Elections.
Inbatad ni Commission on Elections Chairman George Garcia nga ilunglungalong ti ahensya ti “Early Voting Law” tapno mapalubusan dagiti nakapkapuy a sektor nga agparehistro ken agbotos a nasapsapa.
Segun ken ni Garcia, daytoy ket tapno makapagrehistro a nasapsapa dagiti botante.
Mainaig iti daytoy, nagpadespensar ni Garcia dagiti nataengan ken addaan ti rangkap ti bagina a nakumikum iti panagpirma iti sumagmamano a dokumento sakbay a napalubusan dagitoy a nagbotos idi kalman.
Inbatad ni Garcia a narigatan dagiti senior citizens iti panagbotos da kadagiti emergency access polling places (EAPP) gapu ta kasapulan paylaeng nga agpirma da iti waiver tapno maitugot da dagiti balota manipod iti pagyanan da a presinto.
Immuna iti dayto, nagkari ti Commission on Elections nga iti sumaruno nga eleksyon ket awan ton dagiti papeles ken dokumento a kasapulan a pirmaan dagiti nataengan.
