LAOAG CITY – Natiliw ti maysa a baro iti entrapment operation iti Barangay 10 ditoy ciudad ti Laoag kalpasan a tinakaw na ti cellphone dagiti tallo a construction worker nga agtrabtrabaho iti Barangay 23 ditoy ciudad ken inpost na iti social media tapno ilako na dagitoy.
Nabigbig ti suspek a ni Eddie Boy Ancheta, agtawen ti 19, baro ken residente iti Barangay 9 ditoy ciudad idinto a dagiti natakawan ti cellphone ket isuda Pepito Palapos, Denmar dela Cruz ken ni John Patrick Navarro, agpapada a taga Ilocos Sur.
Iti eksklusibo nga interview ti Bombo Radyo Laoag ken ni Ancheta, inadmitir na a naaramid na ti nagtakaw ti cellphone gapu ta nagtalaw iti balay da gapu iti kanayun a panagrir-riri da iti ama na.
Inyistorya ni Ancheta a tawen 2014 idi immuna a nagtakaw ken agtawen pay laeng daytoy idi ti 14 ngem dagus a natiliw ken nagtalinaed iti Departmet of Social Welfare and Development (DSWD) iti uneg ti makatawen.
Inbatad na nga idi nakaruwar iti DSWD idi 2015 ket naminpinsanen a tinallikudan na ti madi nga aramid na ken nagbiruk ti trabaho na.
Nupay kasta, sinublianan na ti madi nga aramid na idi pebrero ita laeng a tawen gapu ta tunggal mabartek ti ama na ket agriri da ken pabpabasolen na daytoy nga isuti makaigapu a nagsina da iti ina na.
Malaksid ti panagtakaw ti cellphone ti suspek ket adda pay ti naal dagiti otoridad a maysa a sachet a naglaon ti maipagarop a marijuana iti ikot ni Ancheta.
Kabayatanna, inpetteng dagiti tinakawan ni Ancheta ti cellphone a saan da a mapakawan ti suspek ken pursigido da a mangipila ti reklamo kontra kenkuana.
Inlawlawag da a nagbalaw da idi makariing da gapu ta awanen dagiti cellphone da, ken iti panag-facebook ti maysa kadagiti biktima ket ditoy a nakita na dagiti cellphone da a naipost ken mailaklako.
Dagus a nakitransaksyon dagiti biktima iti suspek kagiddan metten ti pannaki-koordinar da iti Philippine National Police (PNP) para iti pannakatiliw ni Ancheta.
Isagsaganan ti PNP dagiti dokumento para ti pannakaipila ti reklamo kontra ken ni Ancheta.
