LAOAG CITY – Inpakaammo ni Mr. Steve Menor, maysa kadagiti Medical Technologist iti Laoag City General Hospital (LCGH) nga adda dagiti simmangpet a baro a ramit kangrunaan na iti laboratoryo iti nasao nga ospital.
Segun ken ni Menor, karaman kadagiti baro a pasilidad a naawat iti LCGH ket ti pageksamen para iti sakit a Thyroid, prostate ken dadduma pay.
Malaksid iti daytoy, adda pay ti mausar a ramit a pangeksamen ti dara tapno maamoan no ti maysa a pasyente ket anemic wenno adda ti impeksyon ti dara na.
Inbaga ni Menor nga iyur-uray da pay laeng dagiti technicians ken engineers a mapan mangi-install kadagiti nasao a ramit kalpasan na ket i-demo da payen kadakuada no kasanu nga usaren dagito.
Kabayatanna, inbaga ni Doctor Elizer Asuncion, ti chief of hospital iti LCGH a dagiti naawat da a ramit ket indonar ti Department of Health (DOH) ngem in-facilitate ni Congresswoman Ria Fariñas ti pannakaideliver na iti nasao nga ospital.
Saan met pay a naibaga ni Asuncion no kaanu ti papan dagiti technicians ken engineers para iti pannaka-install ken pannakai-demo dagiti baro a pasilidad iti LCGH.
Maragsakan ni Asuncion gapu ta dakkel a makatulong dagiti baro a pasilidad kangrunaan na iti operasyon ti nasao nga ospital.
Iti sabali a bangir, inpakaammo ni Asuncion nga amin a Memorandum of Agreement (MOA) da iti Medcore ket awan ti nagtuloy, ken naisubli da aminen dagiti dialysis machine ti nasao a kompanya.
