LAOAG CITY – Inpetteng ni baro a Senate President Alan Peter Cayetano a dagiti laeng warrant of arrests kontra ken ni Sen. Bato Dela Rosa nga aggapo kadagiti korte iti Pilipinas ti awaten ti senado iti babaen ti liderato na.
Inrakurak daytoy ni Cayetano kalpasan nga addan ti naiparuk-at a warrant of arrest kontra ken ni dela Rosa manipod iti International Criminal Court (ICC).
Inpaganetget ni Cayetano nga iti babaen ti konstitusyon, masapol a ti mangisyu ti warrant of arrest ket dagiti huwes ditoy pagilian.
Immuna iti daytoy, napaay ti gandat a pannakaiserbi koma ti warrant of arrest kalpasan nga adda ti napasamak a panagkikinnamat iti nagbaetan dagiti personnel ti National Bureau of Investigation ken ni senador Bato dela Rosa, banag a kinondenar ti baro a senate president.
