LAOAG CITY – Ilunglungalong ti Department of Education (DepEd) ti baro nga Executive Order a mangbaliw ti sistema ti suspensyon ken panagtultuloy ti face-to-face classes tapno agbalin a localized ken maibasar iti aktuwal a kondisyon iti maysa a lugar.
Basar iti DepEd, inaprubaranen ti Social Development Committee Cabinet Cluster ti nailungalong a rebisyon iti maipatpatungpal a framework iti babaen ti Executive Order No. 66, series of 2012, kalpasan nga indasar ni Education Secretary Sonny Angara.
Iti lungalong, maaddaan ti tallo a mekanismo it panagdesisyon; automatic class suspensions basar iti national technical thresholds, localized suspensions a desisyonan ti local chief executives, ken granular suspension ken resumption ti klase kadagiti partikular a lugar wenno pagadalan.
Maipalawa pay dagiti hazard a mabalin nga agbalin a pagibasaran ti suspension.
Malaksid iti bagyo, karaman ditoy ti heavy rainfall, panaglayos, gingined, storm surge, poor air quality, volcanic smog ken dadduma pay a volcanic hazards, kasta met ti extreme heat nga umabot iti 40 degrees Celsius wenno nangatngato iti heat index.
Inbatad ni Angara a gagem ti nailungalong nga addang a mapagtalinaed ti kinatalged dagiti agad-adal ken school personnel kabayatan ti panangliklik iti saan a kasapulan a pannakasayang ti aldaw ti panageskwela dagiti estudyante.
Inpakaammo ti Department of Education, manipod Hunyo 8 agingga iti Agosto 31 ita a tawen, mapatta-patta a 20 agingga iti 40 instructional days ti nasayang iti sumagmamano a pagadalan gapu iti dakes a sasaaden ti panawen ken disaster-related suspension ti face-to-face classes.
