LAOAG CITY – Nagepekton ti baro a pammilin ni President Donald Trump iti Estados Unidos a mangipawil iti iseserrek dagiti umili manipod iti 12 a pagilian, kas iti Afghanistan, Myanmar, Chad, Congo, Equatorial Guinea, Eritrea, Haiti, Iran, Libya, Somalia, Sudan, ken Yemen.
Kabayatanna, ti nayun a pito pagilian manipod iti Burundi, Cuba, Laos, Sierra Leone, Togo, Turkmenistan, ken Venezuela ket maaddaan ti limitado nga iseserrek.
Segun ken ni Trump, gagem ti baro a pagannurutan a protehiran ti Amerika manipod iti pangta dagiti gangannaet a terorista gapu ta dagiti nadakamat a pagilian ket addaan ti maipagarop a nalukay a seguridad iti visa, nakapuy a pakabigbigan ken addaan ti nangato a bilang dagiti visa overstay.
Inyarig ni Trump ti maysa nga insidente iti Boulder, Colorado no sadinno a maysa nga Egyptian national ti maiparop a nangibelleng ti gasolina iti grupo dagiti pro-Israel a demonstrator, nupay saan a karaman ti Egypt kadagiti pagilian a nairaman iti travel ban.
Mainaig iti daytoy, nadismaya ti sumagmamano a lider dagiti pagilian nga apektado no sadinno nga inbilin ni Chad President Mahamat Idriss Deby Itno nga isardeng ti panangipaay ti visa para kadagiti Amerikano.
