LAOAG CITY – Natay ti maysa a baro kalpasan a nagbekkel iti uneg a mismo ti kwarto na usar ti tali iti Barangay Fortuna, Marcos, Ilocos Norte.
Binigbig ni Police Captain Johnveil Maramag, ti chief of police iti ili ti Marcos, ti biktima a ni Arnel Ipe, agtawen ti 19, residente met laeng iti nadakamat a barangay.
Inbatad ni Maramag nga iti panagturong da iti lugar ket naibaban ti ama na ti bangkay ti biktima.
Segun ken ni Maramag, adda ti maysa nga ubing a kadwa ni Ipe iti balayda ngem agbuybuya ti telebisyon iti salas idinto a ti ama na ket adda iti taltalon idi nagbekkel ti biktima.
Naamoan a ti ina ti nasao a biktima ket maysa nga OFW.
Inlawlawag ni Maramag a basar iti imbestigasyon da, rumrumuar a depresyon ti makaigapu a nagpakamatay ti biktima gapu ta kasinsina da laeng iti nobya na idi kinettel na ti bukod na a biag.
Innayon ti opisyal a kabayatan ti panagriri dagiti agayan-ayat ket nagpangta ti biktima nga agpakamatay idi inbaga ti babai nga agsina dan.
Saan met a ninamnama ti babai a maaramid ti biktima ti agpakamatay.
Kuna pay ni Maramag a ginandat ti biktima nga ivideo ti panagpakamatay na ngem nalowbat ti cellphone na.
