LAOAG CITY – Nasugatan ti maysa a baro ken maysa a menor de edad iti nagsina a barangay iti ili ti Piddig.
Nabigbig ti baro a ni Dan Mark Balanay y Mateo, agtawen ti 24, baro ken residente iti Brgy. 22 Boyboy ken ti ubing a lalaki nga agtawen ti 6 ken residente iti Brgy. 3 Loing iti nasao nga ili.
Basar iti pakpakauna nga imbestigasyon ti PNP Piddig, itay agarup 7:45 ti bigat a napasamak ti insidente nga addan ti pannakainaig na iti paputok ken nagturong da iti Piddig Distrrict Hospital.
Nasinit ni Balanay ti gapu iti kwitis iti akin kannawan a ramay na idinto a naglapitog met ti akin kannigid a luppo ti ubing.
Nupay kasta, saan a nakana ti sinagaba dagiti dua ken dagus nga inagasan ni Dr. Estella Rivera babaen ti wound dressing.
