LAOAG CITY – Naarestar ti maysa a baro iti naisayangkat a drug buy-bust operation iti Barangay 16 ditoy ciudad ti Laoag.
Nabigbig ti suspek a ni Carlo Domingo Albano, agtawen ti 20, residente iti Barangay 7-B ditoy ciudad ti Laoag.
Nakumpiskar dagiti otoridad iti ikot ti suspek ti maysa a sachet a naglaon ti maipagarop a shabu, maysa a transparent plastic ziplock a naglaon ti napagango a marijuana, maysa a sando bag nga agmaris ti asul a naglaon ti bukel, bulong ken tangkay ti marijuana, sangaribo a pisos a buy bust money, maysa a cellphone, maysa a balisong ken maysa nga stick ti sigarilyo.
Ni Albano ket karaman iti drug watchlist iti PNP-Laoag ken probinsya nga Ilocos Norte ngem saan a drug surrenderee.
Kabayatanna, inbatad ni Police Lt. Col. Amador Quiocho, ti chief of police ditoy ciudad ti Laoag a nabayagen a monmonitoren da ni Albano mainaig iti illegal nga aktibidad na.
Kuna na a ni Albano ket karaman iti Top 10 Drug Watchlist ditoy ciudad ti Laoag.
Innayon na nga iti barangay a nakatiliwan ni Albano ket maysa kadagiti ibilang na nga umuk dagiti dadduma nga agus-usar ti illegal a droga.
Inpakaammo pay ni Quiocho a basar iti monitoring da ket malaksid ditoy ciudad ti Laoag ket agop-operar pay ni Albano iti sumagmamano nga ili kas iti San Nicolas, Sarrat ken Vintar.
Mamati nii Quiocho a ti kangrunaan nga agbalbalin a kostumer ni Albano ket dagiti agtutubo gapu ta nalaklaka laeng ti presyo ti marijuana no ikompara ti shabu.
Iti agdama, nagtalinaed ni Albano iti kustodyar ti PNP-Laoag ken intono bigat ti pannakaipila ti reklamo a panaglabsing iti Republic Act (RA) 9165.
Inpalagip ni Quiocho a ti nasao a kaso ket non-bailable ken kitkitaen da ti possible a panangipila da ti panaglabsing ni Albano ti Quarantine Law.
