LAOAG CITY – Naarestar ti maysa a baro kalpasan a maipagarop a nagtakaw ti cellphone iti sango ti Cockhouse iti Barangay 8 ditoy ciudad ti Laoag.
Nabigbig ti suspek a ni Harold Dave Meram Constantino, agtawen ti 22, baro, ken residente iti Barangay 1 ditoy ciudad.
Iti report, agawid koman ti biktima a ni Francis Chantioco Pacubas, agtawen ti 22 ken taga Barangay 46, Nalbo ditoy ciudad idi nadlaw na nga awan ti Iphone 7 Plus na nga agmaris ti nangisit.
Inpadas na a tawagan ti cellphone na ngem saanen nga agring agingga a napan inbaga ti maysa nga empleado iti bar a nakita na ti suspek nga innala na ti cellphone na.
Iti insayangkat nga hot pursuit operation dagiti otoridad ket nakita da ti suspek iti sirok ti Gilbert Bridge ngem saanen a mabalin nga usaren ti cellphone gapu ta tinaltal na.
Inadmitir ti suspek nga innala na ti cellphone ngem saanen a nangipaay ti dadduma a detalye no apay a tinaltal na daytoy.
Pursigido met ti biktima nga agpila ti reklamo kontra iti nasao a suspek.
