LAOAG CITY – Natay ti maysa a baro kalpasan a pinaltogan na ti bukod na a bagi iti ili ti Burgos.
Daytoy ti kinumpirmaran ni Police Lt. Carlo Rabago, hepe ti PNP Burgos.
Kuna ni Rabago nga agtawen ti 32 ti biktima, agpapaay iti Insurance Claims Assistance ken residente iti nasao nga ili.
Inbatad na a saan da pay a masinunuo ti rason a nagpakamatay ti biktima babaen iti panangpaltog na ti ulo na.
Iti inisyal nga imbestigasyon, agarup alas-kuatro kinse idi malem kalman a nakanged ti putok ti kabsat ti biktima iti uneg ti pagtaengan da.
Napan kinita ti maseknan ket dita nakita da a dara-dara ti biktima ken dagus a naitaray iti ospital ngem naideklara a dead on arrival.
Narekobre dagiti otoridad ti maysa a kalibre 45 a paltog, magazine nga addaan ti uppat a bala, maysa a kapsula, ken buli iti nasao a klase ti paltog.
