LAOAG CITY – Kinumpirmaran ni Police Captain Carlo Abing, chief of police ti PNP-Sarrat a pimmusay ti biktima ti napasamak a desgrasya iti paset ti Barangay 24, San Roque iti nasao nga ili.
Ti biktima ket agtawen ti 18, baro ken residente iti Barangay 6, San Leandro iti nasao nga ili.
Iti imbestigasyon dagiti otoridad, bayat nga agturong iti abagatan a direksyon ti biktima ket immovertake iti maysa a motorsiklo ngem iti panagsubli na iti linya na iti kalsada ket nadungpar na ti nakaparking a multicab, kukua ti agtawn ti 50, naasawaan, maysa a utility worker ken residente iti Barangay 24 iti nadakamat nga ili.
Gapo iti daytoy, nagsagaba ti sugat iti nagduduma a paset ti biktima ken rumrumwar a nalulo ti ulo na.
Naamoan a kalpasan ti desgrasya ket awan ti dara a rimwar manipud iti ulo ti biktima isut gapo na a maipagarop nga internal hemorrhage wenno internal bleeding ti nakatayan na bayat nga adda iti Gov. Roque Ablan Senior Memorial Hospital ditoy ciudad ti Laoag.
Basar met iti palawag ti kadwa ti biktima, naggapo da iti paggi-inuman.
