LAOAG CITY – Kalikagum ni P/Lt.Col. Ryan Retotar, ti baro nga Hepe ti Laoag City Police Station nga ad-adda pay a mapaigetan ti pannakikammayetda kadagiti opisial ti barangay ditoy siudad ti Laoag.
Segun kenkuana, addan ti immun-unan a pannakisarsaritada kadagiti opisial ti barangay pakairamanan dagiti barangay tanod para iti naig-iget pay a pannakikoordinarda iti tunggal maysa.
Inbatadna a masapul nga aramiden daytoy nga addang kalpasan a naobserbaranna a dagiti napasamak a pammaltog iti kallabes ditoy siudad ket adayo kadagiti national highway wenno dagiti adda kadagiti nasusulinek a paset iti lugar.
Inlawlawagna a kasapulan ti kapulisan ti naan-anay a tulong manipud kadagiti opisial ti barangay nangruna ket saan a maserrek dagiti patrol car dagiti babassit ken naiilet a kalsada dagiti barangay.
Maipalagip a sinukatan ni P/Lt.Col. Retotar ni P/Lt.Col. Andrew Rabang a dati nga Hepe ti Laoag City Police Station.
Naammoan a ni Retotar ket dati a mangidadaulo iti Deputy Provincial Director for Operations (DPDO) iti Ilocos Norte Police Provincial Office.
Kabayatanna, inpasingked ni P/Lt.Col. Retotar a nakasagana ti kapulisan para iti mapaspasangasangan a Pamulinawen Festival tapno maipasigurado ti linak, urnos ken talna iti intero a siudad kabayatan ti fiesta.
