LAOAG CITY – Inrakurak ni Russian President Vladimir Putin a mai-deploy idiay Belarus ti baro nga hypersonic missiles ti pagilianda.
Inbatadna a nakapilin dagiti militar kadagiti deployment sites idiay Belarus para iti Oreshnik intermediate range ballistic missile.
Inlawlawagna a manarimaan pay laeng ti pannakaisagana daytoy ken manamnama a malpas sakbay nga agngudo ita a tawen.
Mainaig iti daytoy, immuna a nagusar ti Russia ti Oreshnik wenno hazelnut tree kontra iti Ukraine idi Nobiembre iti napalabas a tawen no sadinno a tinamaanda ti experimental weapon iti maysa a factory ti Dnipro a pagar-aramidan ti missiles.
Dinayaw ni Putin ti kabaelan ken kinapigsa ti Oreshnik a makadadael kas nuclear attack.
Nagballaag daytoy nga usarenda ti nasao nga armas kontra kadagiti kaalyado ti Ukraine a nangipalubos iti Kyiv nga usaren ti longer-range missiles tapno rauten ti Russia.
Naammoan a ti intermediate-range missiles ket makatayab ti 500 agingga iti 5,500 a kilometro.
Kabayatanna, napawilan dagiti nasao nga armas babaen ti katulagan idi panawen ti Soviet a binaybay-an ti Washington ken Moscow idi 2019.
