LAOAG CITY – Inkari ni baro a nadutukan a National Bureau of Investigation (NBI) officer-in-charge Angelito “Lito” Magno nga itultuloy na dagiti imbestigasyon ken reporma a rinugyan ni outgoing director Jaime Santiago.
Inrakurak na daytoy kabayatan ti panagbitla na iti naisayangkat a turnover ceremony.
Karaman kadagiti isyu nga im-imbestigaren ti National Bureau of Investigation ket ti ghost flood control projects, kasta pay ti pannakaiwaras ti saan nga umiso nga impormasyon mainaig iti imbestigasyon nga iwaywayat ti Independent Commission for Infrastructure para iti flood control.
Malaksid kadagitoy, inbatad ni Magno nga ilungalong da ti digital justice tapno pagbalinen a moderno ti pannakaiwanwan ti kaso ken dagiti proseso ti forensic.
Innayon na a papigsaen da pay ti NBI Academy of Excellence tapno makaadal, saan laeng a dagiti adda ti kabaelan na no di ket uray dagiti compassionate investigators.
Kuna na pay nga adaptaren da ti open bureau policy a mangitandudo ti transparency kabayatan ti panangsalanib da ti integridad ti imbestigasyon.
Immuna iti daytoy, kabayatan ti turnover ceremony ket inpasa ni Director Santiago ti bandera ti National Bureau of Investigation ken ni Magno.
