LAOAG CITY – Nagsagaba ti sugat iti ulo ti maysa a baro kalpasan a tinagbat ti uliteg na iti paset ti Brgy. 1-S Valdez iti ciudad ti Batac.
Nabigbig ti biktima a ni Lowel Cocson y Flores, agtawen ti 18, baro, caterer idinto a ti suspek nga uliteg na ket ni Bernard Cocoson y Grafel, 52, naasawaan, awanan ti trabaho, agpada dagitoy a residente iti nadakamat a lugar.
Iti imbestigasyon, apaman a nakasangpet ti biktima iti balay da ket prinobokar na ti suspek a nangitunda iti nabara a diskusyon iti nagbaetan dagiti dua.
Kalpasan iti daytoy, nagawid ti suspek iti family house da ngem sinurot ti biktima ken ginandat na nga asitgan ti uliteg na ngem kellaat na lattan a tinagbat a nakatamaan ti ulo ti ubing a Cocson.
Naitaray ti biktima iti Mariano Marcos Memorial Hospital and Medical Center iti ciudad ti Batac para iti pannakaagas na idinto a ti suspek ket nagtalinaed iti kustodyar ti PNP iti nasao a ciudad.
