LAOAG CITY – Naragsak nga inpakaammo ni Mr. Jay Lagatero, School Head ti Barong National High School iti ili ti Dingras a nakagun-odda ti nagduduma a pammadayaw manipud kadagiti nakisalipanda a kompetision.
Daytoy ket kagiddan iti pannakaselebrar ti Linggo ng Kabataan ditoy probinsia.
Segun ken ni Mr. Lagatero, nakisalip dagiti estudiante iti pagadalanda kadagiti nagduduma a pasalip kas ti Poster Making, Spoken Poetry, Dance Drama Competition ken dadduma pay.
Inbatadna a babaen iti daytoy ket ad-adda pay a maasa ti talento dagiti estudiante a mangnayon ti gagar dagitoy a mangipakita ti maipanpannakkel a talentoda.
Inlawlawagna a saan a nagpaudi ti Barong National High School gapu iti hakot awards a naalada kas ti Best Actress, Best in Choreography, Best in Script in Dance Drama Competiton ken dadduma pay nga special awads.
Malaksid iti daytoy, kuna ni Lagatero a nagun-odda ti balligi iti Poster Making nga addaan ti tema a “Gender Identity.”
Naammoan nga agarup dua a lawas laeng ti kapaot a nagsagana dagiti nasao nga estudiante tapno makilaban kadagiti nagduduma a pasalip.
Innayonna nga adda ti pakabuklan a 33 a ribu a pisos ti nagun-odda a premio no sadinno ket sumagmamano ditoy ket inpaayda kas gungguna kadagiti maseknan nga agad-adal idinto dagiti dadduma ket maikabil kas pundo para iti Dayaw Cultural Troupe.
