LAOAG CITY – Inlawlawag ni Mr. Jose Malapira ti Presidente ti BASCA iti Sitio Bungro, Barangay Pragata iti ili ti Pasuquin no apay a saan pay a naited ti burial assistance ti pimmusay a miembro a ni Mr. Cipriano Tambio.
Segun kenni Malapira, daytoy ket gapo ta saan pay a nakolektar amin a bayad dagiti miembro no sadinno nga agbayad da ti 20 a pisos iti kada maysa a matay.
Inbatad na a narigat da a makasingir gapo ta maipagarop a saanen nga agbaybayad dagiti saan nga aktibo a BASCA members.
Kunana nga umabot ti 23 a ribo a pisos ti maawat ti pamilya ni Tambio ken iti barangay da ket adda ti agarop 40 a miembro.
Mainaig iti daytoy, kuna ni Malapira a saan pay a nakumpleto ti kwarta ken saan na nga ammo no manon ti nakolektar.
Nupay kasta, inbatad na nga iti panagmimeeting da iti daytoy a bulan ket ma-audit ti kwarta ken manamnama a maited ti partial a bayad.
