LAOAG CITY – Inpakaammo ni Vice Mayor Rey Carlos Fariñas a saan a mausar dagiti estudiante ti Gabaldon Elementary School ditoy siudad ti Laoag ti Baseball Field-da gapu iti parikot no asino ti akinkukua ti lote.
Segun kenkuana, ti titulo ket nakainagan a mismo iti Gabaldon Elementary School ngem adda ti donasion ti Department of Public Works and Highways a covered court rason a saanda nga ammo no asino ti akinkukua ti nasao a lugar.
Inbatadna nga awan ti umno a turnover ti covered court no kukua daytoy ti barangay wenno iti mismo a pagadalan gapu ta idi tawen 2023 pay laeng idi naipatungpal.
Malaksid iti covered court ket adda pay ti nakaipatakder a Population Commission Building a naaladan manipud iti City Government a rason a problema iti agdama no ania ti kukua ti nasao a pagadalan.
Gapu iti daytoy, nairekomendar ti panangkita ti City Assessor’s Office ken ti pannakaiyumanna iti Department of Public Works and Highways tapno malawlawagan no asino a mismo ti mangusar ti lote.
Kabayatanna, inadmitir pay ti Bise Mayor a maipaima latta daytoyen iti sumaruno nga administrasion no ania ti rumbeng a maaramid nangruna ket karigatna itatta gapu iti transition period.
